前新聞主播方健儀日前喺Facebook專頁宣布,自己已經參加咗香港中文大學醫學院嘅「無言老師」遺體捐贈計劃,佢上載照片展示感謝狀同遺體捐贈咭,表示佢嘅志願係「將來做一位無言老師,協助醫療技術的發展,令更多病人重獲新生。」有唔少網民都留言支持,甚至表示自己同樣已經成為「無言老師」。

中大醫學院助理院長(教育)陳新安教授喺遺體捐贈計劃網站表示,人體解剖學係醫學訓練中,深入認識人體結構嘅重要課程,遺體捐贈者就係當中最默默無聲地付出同教導嘅一位老師,佢哋除咗以身軀教導學生,更有助發展同改良手術技術,提升手術成功率同安全性。

計劃網站又介紹捐贈程序,建議捐贈者健在時應先同家人商量,並且得到家人同意,捐贈者辭世後,由親友向醫院同大學表達捐贈意願,再由大學作相關安排,而親友可以選擇是否需要舉行儀式,或者由大學代領遺體。完成教學同研究後,會舉行告別儀式,由職員將心意卡同包好嘅遺體放入棺木,再通知家屬安排殮葬或者授權大學安排火化。

原圖:FB@方健儀 Akina Fong