喺教堂行紅地毯係唔少女仔嘅夢想,即使係殘障女仔亦唔例外。菲律賓一位新娘Rosie Babor,天生無腿,生活比一般人過得艱難。好彩佢喺3年前遇到咗佢嘅真命天子,兩人最近終於拉埋天窗,Rosie決定唔靠輪椅,要憑自己嘅力量爬過紅地毯,令呢一日變得更加特別。

Rosie因為天生無腿,要靠雙手行路,飽受歧視,令佢嘅求學、求職之路充滿艱辛。好在Rosie個性樂觀,堅毅,身邊有唔少朋友,佢更喺3年前識到真命天子Mario。Mario唔單止無介意Rosie身有殘疾,仲願意扶持佢一世。上個禮拜一(10月5號)佢哋喺教堂舉行婚禮,Rosie渴望好似其他女仔咁行過紅地毯,所以拒絕用輪椅代步,堅持用手爬過去。佢左手拎住白色花球,右手撐起身體,由教堂門口,一步步爬到新郎身邊。

雖然Rosie著住特製婚紗,但要兼顧花球,顯得有啲吃力,期間有親友想上前幫手,不過Rosie依然面帶笑容,奮力向前。終於佢行到新郎面前,同大家講:「我堅持靠自己力量爬過紅地毯,是因為我想告訴所有人,我的人生就是這樣走過來,這個婚禮上的困難對我來說不算是什麼,未來的路我也會堅持下去。」Rosie同Mario嘅婚禮影片被親友擺上網分享,感動咗無數網民,更鼓勵咗其他殘障人士。

圖:YouTube@Viral Press