近排香港啱啱轉季,雖然涼爽咗唔少,但天氣就乾燥好多,唔少人嘅皮膚(尤其係敏感皮膚同有濕疹人士)容易痕癢、脫皮,有啲人更加會流鼻血。今日小編特登請教註冊中醫馬琦傑,睇下有無啲滋補湯水或茶可以推介俾我哋,同埋為我哋講解食大閘蟹有咩注意事項。

 馬醫師指出,喺中醫角度嚟講,肺主皮毛,秋燥傷肺,因此容易出現肺燥,皮膚乾燥等情況。可以食一啲潤肺清燥嘅食品。佢推薦咗雪耳潤燥湯同雪梨菊花飲嚟潤肺清燥,做法相當簡單,大家得閒不妨自己喺屋企整嚟飲。

雪耳潤燥湯

材料:雪耳1-2朵、麥冬3錢、桑葉1錢、無花果1個、南北杏各1錢、瘦肉半斤、清水適量

 做法:

1.雪耳浸泡備用

2.瘦肉汆水備用

3.其他材料洗淨備用

4.清水煲滾後,加入所有材料,轉中小火煲1-1.5小時即可。

 

雪梨菊花飲

材料:雪梨1至2個、乾百合2錢(鮮百合用量加倍)、麥冬2錢、菊花1錢、冰糖適量、清水適量

 做法:

1.雪梨去芯去核,切塊備用

2.其他材料洗淨

3.水滾後加入除菊花、冰糖外所有材料,轉中小火,煲約30分鐘,加入冰糖煮溶,熄火後,加入菊花焗5分鐘即可。

圖:受訪者提供、網上圖片