好多人日日返屋企都有住家飯食,大家有無諗過呢種幸福唔係必然?署名為「老母的不肖女」嘅網民喺facebook群組「Day Day Explode日日爆」投稿指,自己媽媽患上胃癌,身體虛弱無辦法下廚,網民為咗氹媽媽開心,親手劏雞煮俾媽媽食,點知就揦手唔成勢,不禁感慨媽媽好本事。網民呼籲大家多啲欣賞媽媽嘅「為母則強」,同埋珍惜當下。

網民以前成日都聽到身邊有小朋友嘅friend講「為母則強」,直至自己劏雞先有啲體會到。網民嘅媽媽胃癌復發,唔係好食到嘢,但就好鐘意研究煮雞同食雞。網民自己煮嘢食唔叻,不過有感媽媽嘅時日無多,想珍惜同媽媽一齊嘅日子,於是頂硬上買咗隻雞返嚟自己劏,整炒雞俾媽媽食。但係對住隻雞,網民都唔知點落手,既擔心雞骨會插損個口腔,又劏得好攰,令佢不禁感慨:「以前所有嘢都take it for granted,到宜家要親手打理呢頭家每件大小事,我先知道媽咪呢個女人有幾本事。」

雖然網民唔知自己呢一世有無可能劏好一隻雞,但佢就唔怕去試去做。佢最後喺文末呼籲大家忙於分享偉大媽媽嘅魔廚料理嘅同時,亦不忘欣賞佢哋嘅「為母則強」,同埋珍惜每個相處嘅當下。

圖:FB@ Day Day Explode日日爆