去旅行參觀古蹟,偷走碎片或會被視為偷走文物,有機會違反當地法律,有人更因此而招來厄運!加拿大一名女子15年前喺意大利著名景點龐貝古城偷走碎片,諗住拎返屋企做紀念,點知呢啲「紀念品」為佢帶嚟多年厄運。

外國傳媒報道,現年36歲嘅Nicole,喺2005年參觀龐貝古城嘅時候,因為想得到其他人未曾擁有過嘅歷史碎片,所以佢就拎走古蹟嘅一啲碎片。但點知拎返屋企之後,多年嚟厄運連連,包括2次患乳癌,而佢同屋企人亦身陷一系列財務危機。

佢唔希望厄運繼續禍及家人同小朋友,於是就將2塊馬賽克磁磚、雙耳瓶碎片同1塊陶瓷碎片,寄到龐貝古城旅遊管理部門歸還,並寫信道歉,希望得到上帝寬恕。

龐貝古城因為公元79年發生嘅維蘇威火山大爆發,而被火山灰埋藏,直至16世紀先至被發現,現時龐貝古城係意大利最受歡迎嘅景點之一。

原圖:新華社