喺「口罩令」生效下,郊野公園範圍內獲得豁免,有唔少人到郊外行山,做運動之餘,亦趁呢個機會暫時除低口罩,呼吸下新鮮空氣。不過有部分無公德心嘅民眾就留低咗唔少垃圾,有班熱心嘅菲傭姐姐就趁住假日組團去郊外執垃圾,獲網民大讚。

有網民喺Facebook群組「新手假日行山群組」貼圖發文,指一班菲傭姐姐喺清水灣扭紋洞搬咗20幾、30袋垃圾,而嗰度遠離最近嘅公路都要成200幾米,都有咁多垃圾,質疑「土生土長嘅香港人醜唔醜」。樓主又補充,當時呢班菲傭姐姐有遵守限聚令分開行,係佢要求影集體相。

帖文引嚟唔少網民讚好、留言,有網民留言表示感謝,亦有網民指其實假日有唔少外籍人士都會喺郊野公園清理垃圾。

原圖:FB@~新手假日行山群組HikingNoviceGroup~