唔知大家點樣定義「孝順」呢?俾好嘅居住環境父母?定豐富嘅物質生活?其實,父母要嘅嘢好簡單,就係子女嘅陪伴。內地吉林有個56歲嘅男人,每日都陪82歲媽媽做運動,仲自己發揮創意用新奇道具打兵乓波、羽毛球、擲飛碟等,媽媽不禁感歎:「我太幸福了」。

吉林省四平市56歲嘅鄭力,陪82歲媽媽用擀麵棍打乒乓波嘅影片,近日喺網上好紅。由影片可見,鄭力同媽媽打乒乓波並唔係用兵乓球拍,而係用擀麵棍尾部,二人精準咁互相傳波、接波,極考眼力同手部協調。鄭力話,佢為咗舒緩媽媽嘅腰腿痛、肩周炎,由2000年開始陪媽媽做運動鍛煉身體。起初佢哋會打網球同羽毛球,不過因為媽媽之前無做開運動,為咗增加運動趣味,鄭力就諗出好多新奇玩法,例如用乒乓波拍嘅尾部、木質陀螺、網球拍等唔同工具嚟打波,甚至同時打兩個波等。

其中媽媽最鐘意嘅運動係頂球同飛碟,就連鄭力煮飯期間嘅小小空擋時間,媽媽都要鄭力陪佢玩,有時媽媽玩得開心仲會話:「我太幸福了」。好多人睇完二人做運動嘅片都覺得好感動,大讚鄭力好孝順,但鄭力就唔覺,仲話自己做得唔夠。不過媽媽就好滿意鄭力,同佢講:「你就陪我一生到底吧」。

圖:微博@人民日報