出去海邊游水或者進行滑浪等水上活動嗰陣,真係要份外小心。喺澳洲,一位曾經贏得世界衝浪聯賽冠軍嘅澳洲滑浪選手,早前喺新南威爾士省海域滑浪嘅時候,有條大約長1.5米嘅鯊魚喺佢附近徘徊,但佢對此懵然不知,好彩當時有非政府組織衝浪救生組織,透過航拍機發現,並發出警告提醒,讓呢名滑浪選手得以安全離開。

根據當地傳媒報道,事主叫Matt Wilkinson,現年32歲,係當地一位知名滑浪選手,曾經响世界衝浪聯賽贏得冠軍,佢啱啱喺今個月3日先至結婚。事件發生响10月7日,Matt喺新南威爾士省巴利納嘅夏普斯海灘滑浪,佢憶述當時自己喺滑浪板上划行,突然聽到航拍機嘅蜂鳴警告,就諗都唔諗即刻返上岸,事後睇返救生員展示嘅航拍機影片,先至知原來當時附近有條大約1.5米長嘅鯊魚喺自己附近。呢條鯊魚最終唔知係因為Matt嘅腿部動作,定係被航拍機嘅蜂鳴警告聲嚇走,令Matt得以逃過一劫。

新南威爾士衝浪救生組織(Surf Life Saving NSW)每日都會以航拍機監視鯊魚蹤迹,今次就多得呢部航拍機先至救返Matt一命。

原圖:FB@Surf Life Saving NSW