新冠肺炎疫情下,各國限制出入境、航班暫停,但都阻唔到對親人嘅思念。喺意大利西西里島,一位10歲少年Romeo Cox,疫情期間希望探望住喺英國倫敦嘅嫲嫲,但無奈航班暫停,一直去唔到,於是佢萌生徒步去英國嘅念頭,最終喺爸爸Phil嘅陪同下,用咗超過3個月時間,走完2735公里路程,去到倫敦同嫲嫲見面,場面感人。

Romeo去年隨父母由倫敦東部移居至意大利西西里島,剩低嫲嫲留喺倫敦居住,至今已經1年無見,因為疫情關係而無法搭飛機返倫敦探望,於是Romeo就萌生徒步去倫敦嘅念頭。不過呢個諗法實在太瘋狂,父母起初都多番拒絕,不過最終都同意喺爸爸嘅陪同下行去倫敦。

Phil同Romeo兩父子於6月20日由巴勒莫出發,沿途經過意大利、瑞士、法國同英國等國多個城市,行程超過8成時間都係徒步,其餘就係坐船同踩單車,期間試過喺修道院同青年旅館過夜,又試過迷路、遇到惡狗,不過Romeo坦言從來無諗過放棄,越接近倫敦就越想盡快見到嫲嫲。

Phil同Romeo喺上個月21日抵達達倫敦特拉法加廣場,開始接受14日居家隔離,直至上週日(4日)Romeo終於可以同嫲嫲見面,二人激動相擁,嫲嫲亦表示對Romeo感到驕傲。

Romeo亦藉住呢趟旅程為難民組織「Refugee Education Across Conflicts Trust」籌款,最終籌得超過1.3萬鎊(約13萬港元)。佢表示,佢嘅好朋友Randolph當年由加納逃難至西西里島,過程中無充足嘅水同食物,而且路程更遙遠、更危險,而Romeo初初搬到西西里島,多次獲Randolph幫助,所以Romeo都希望藉今次機會幫助其他有需要嘅小朋友。

原圖:Twitter@GameshowTheatre