唔少專家都曾經講過,唔好自己亂咁撩耳垢,因為咁樣有機會令耳垢越推越入,導致耳朵不適,影響聽力。喺台灣,最近就有一位醫生喺電視節目上分享病例,有病人因為耳朵不適求診,及後確診患上罕見癌症,佢仲話撩耳朵有機會令耳朵嘅皮膚細胞演變為癌症!

台灣耳鼻喉科醫生吳昭寬喺電視節目《醫師好辣》上,分享一宗病例,病人係一位50歲女子,佢因為油性耳,容易出現耳垢阻塞,所以佢每隔3個月都會定期去耳鼻喉科清理。後來佢耳鳴、耳悶嘅情況嚴重,又有頭暈症狀,由於佢覺得耳朵好痕又塞,佢輕輕用棉花棒一撩,發現耳垢呈黑紅色、似「松露混番茄醬」。

之後吳醫生用窺鏡檢查,發現佢耳朵入面有一個好大嘅「粉紅色肉團」,切片檢查後發現係個2厘米大腫瘤,確診患上罕見嘅「耳道鱗狀上皮細胞癌」,因為耳道被腫瘤塞滿,而出現痕癢同耳鳴等情況,做完手術同接受其他治療之後,目前康復情況唔錯。

吳醫生表示,唔好睇小耳朵呢個部位,當腫瘤侵襲神經部位,有機會癱瘓聽覺系統,佢又提醒唔好亂咁撩耳朵,因為過度嘅機械刺激,會令耳朵嘅皮膚細胞演變為癌症,而慢性發炎物質亦會產生惡性病變。

原圖:搜狐