相信唔少人都試過,見到啲外表似男性嘅女士,或者似女性嘅男士,會好驚用錯稱呼,造成誤會。喺俄羅斯,就有位女子舉重運動員外形非常似男性,但就竟然因為咁而遭到航空公司職員刁難、侮辱,令呢位女運動員非常難堪。

俄羅斯女子舉重運動員圖拉耶娃(Anna Turaeva)現年42歲,曾經贏得6次世界冠軍,早前佢喺聖彼得堡(St. Petersburg)準備登上飛往克拉斯諾達爾市(Krasnodar)嘅客機時,航空公司職員打量佢嘅身形,懷疑佢同身分證資料不符,之後就將佢攔住,當眾大聲問「發生性行為時係同男性定女性?」,令佢感到受辱。

圖拉耶娃表示好難受,當時喺大庭廣眾下好似小朋友咁被質問,又問床上表現如何,當時佢努力保持冷靜,而後面嘅人都望住佢,令佢覺得好無奈,只好盡量證明自己係女性。

圖拉耶娃最終都順利登機,但今次經歷已經對佢造成不可磨滅嘅傷害。佢表示,自己2007年開始就束胸、綁起頭髮接受訓練,一年前更切乳房以免妨礙練習,佢坦言「我為國家付出血汗,唔應該受到呢種待遇。」航空公司事後向圖拉耶娃道歉,強調唔會容忍職員呢種惡劣行為,會進行內部檢討同培訓。

原圖:Twitter@coconutnbasil