唔少家長都會望子成龍,由細細個就栽培子女入名校、上大學。最近就有位男網民,喺Facebook專頁「名校 Secrets」發文,表示唔希望兒子為咗入名校而搞到晚晚因為功課而喊,佢又分享自己讀名校嘅經歷,認為就算讀名校,日後嘅路都唔會因為咁而變得平坦。不過帖文一出,留言嘅網民反應兩極,指其實樓主已經受惠於自己讀名校而不自知。

呢位發文嘅男網友表示,自己係草根、單親家庭出身,媽媽打幾份工,希望俾最好嘅嘢佢,為佢鋪路入間名校,希望可以出人頭地,最終如願派入第一志願嘅名校,而畢業之後亦順利入讀中大。

不過佢坦言,其實讀名校並唔快樂,「始終融入唔到有錢同學嘅社交圈子」,而自己畢業頭5年日日做足20個鐘,都只係得萬鬆啲人工,相反其他同學就可以繼承父業,或者喺外國過無憂無慮嘅日子。佢表示自己好好彩,後來靠自己積落嚟嘅人脈,加入成為大公司嘅企業公關,再自己開公司,現時總算能夠生活。

佢表示太太希望兒子好似佢咁入名校,但佢就反問太太,希望因為兒子無壓力而開心笑,定係為咗自己虛榮心而要兒子晚晚因為功課而喊換返嚟,佢仲話表示入名校,唔代表日後嘅路會變得平坦,希望兒子明白所有嘢都係要自己爭取。

不過留言嘅網民反應兩極,有網民表示認同、「小朋友有開心童年係好重要」,但有唔少網民指樓主嘅人脈就係讀名校嘅回報,亦有網民指係多得樓主媽媽嘅催谷,樓主先有而家嘅成就。

原圖:大公報