每個人都有追尋夢想嘅權利,絕對唔會因為貧窮而卻步。內地四川涼山有個14歲少年楊文忠自細鐘意游水,成日喺村入面嘅小池塘游水,夢想成為一位游泳選手。楊文忠爸爸擔心囝囝嘅安全,索性喺屋企附近挖咗一個小泳池俾佢游。殘奧會游泳冠軍宋懋璗得知事件後決定幫助楊文忠,為佢提供正規訓練實現夢想。

楊文忠由8歲開始鐘意游水,經常同朋友仔去小池塘游水。自從佢喺電視上見到游泳運動員比賽之後,佢就夢想成為一位泳手。雖然佢家境清貧,無游泳池練習同正規訓練,但就無阻佢想成為泳手嘅決心。楊爸爸知道囝囝鐘意游水,亦無阻止,只係會擔心佢嘅安危。於是,楊爸爸喺屋企附近挖田儲水,DIY咗一個小泳池俾囝囝練習。

殘奧會游泳冠軍宋懋璗由朋友口中得知事件,備受感動,主動聯絡楊文忠為佢提供訓練。宋懋璗仲特登搵咗一部挖機,喺楊爸爸DIY嘅簡陋泳池基礎上,挖咗一條泳道,再鋪一層油布,等小泳池啲水乾淨啲。宋懋璗更成為楊文忠嘅教練,訓練佢游水,宋懋璗仲計劃之後將楊文忠接到杭州接受正規系統培訓,幫助楊文忠圓夢。

圖:梨視頻