朝早趕住返工返學,有啲人會選擇索性唔食早餐,不過長時間唔食早餐係會對身體無益!喺內地就有一位少女,因為長期唔食早餐,而生膽結石,需要做手術取出。

內地傳媒《現代快報》報道,揚州11歲少女麗麗(化名)早前經常感到上腹痛,去到醫院求診,住院檢查後發現麗麗嘅膽總管下端結石、膽囊多發結石,起初醫院對麗麗進行抗感染等對症治療,麗麗嘅疼痛情況有好轉,但食完飯依然覺得腹痛,麗麗嘅屋企人就帶佢去其他醫院求醫,最終麗麗就去到揚州大學附屬醫院進行手術。

揚州大學附屬醫院為麗麗進行內視鏡逆行性膽胰管造影(ERCP)手術,取出結石,手術後恢復良好,並已經喺上月底出院。主診醫生吳健表示,膽囊結石有好多唔同成因,最常見嘅包括高脂、高糖、高膽固醇飲食、唔食早餐等等,會導致膽汁分泌紊亂、膽汁成分改變,膽汁內有結晶析出,形成結石。吳健又話,麗麗就係經常唔食早餐,佢解釋,朝早唔食嘢就無法刺激膽囊排空,再加上現時小朋友運動量少,膽囊肌收縮功能就會下降,膽汁繼續留喺膽囊內,令膽汁濃度增加,同樣會析出結晶,形成結石。

吳健提醒家長,要注意小朋友飲食,少食油膩、垃圾食物,多食蔬果,保持運動量。

原圖:大公報