喺新冠肺炎疫情下,市民外出消費嘅意欲下降,對唔同行業造成打擊。香港旅遊發展局就宣布,同香港品質保證局合作,為旅遊相關行業提供統一衞生防疫指引,讓公眾識別,亦增加旅客訪港信心。

旅發局主席彭耀佳表示,已經有超過1800間公司同商舖表示有意參與計劃。計劃將分兩階段推出,首階段由今日(8日)起接受申請,涵蓋購物商場、酒店、旅遊景點、入境旅行社及優質旅遊服務計劃下嘅餐飲同零售商戶,之後計劃會擴展至跨境旅遊巴士公司、旅遊巴士公司、會展場地同其他零售、餐飲商戶等。

旅發局表示,參與嘅公司或商舖須遵守一系列衞生抗疫措施,通過審核後,會上載資料到計劃嘅網站(https://hkhygiene.hkqaa.org),呢啲公司同商舖亦可以展示已承諾遵守衞生抗疫措施嘅標誌,供公眾辨識,而香港品質保證局亦會派員突擊巡查。

另外,為咗減輕業界負擔,旅發局將會全額資助合資格企業參與計劃嘅申請費用。

原圖:RTHK