唔少人覺得靠拾荒維生唔多光彩,但泰國少女Khanittha Phasaeng就唔係咁諗,佢媽媽靠拾荒養大佢同細佬,就算Khanittha之後當選選美比賽冠軍亦樂於公開自己嘅背景,並不為自己拾荒維生而自卑,當選更返屋企跪謝媽媽,感激佢嘅養育之恩。

17歲嘅Khanittha別名「薄荷」(Mint),出身北欖府一個貧困家庭,媽媽靠拾荒獨力湊大佢同細佬。為咗減輕媽媽嘅負擔,Khanittha高中畢業後就四出打工,協助媽媽執垃圾同分類回收幫補家計,兼幫手照顧細佬。Khanittha朋友見佢生得靚,鼓勵佢去參加選美比賽,可以增廣見聞之餘,仲有機會改善屋企人生活嘅環境。Khanittha抱住試下無妨嘅心態,參加咗Miss Uncensored News選美比賽,竟意外殺入決賽,最終仲爆冷贏得冠軍。Khanittha當選後亦都難以置信,無辦法相信好似佢咁平凡嘅女仔竟然可以成為選美皇后!賽後Khanittha即刻返屋企,喺垃圾桶附近見到媽媽,當街以泰國嘅傳統方式,雙手合十跪地感謝媽媽嘅養育之恩。呢個感人一幕被傳媒影低喺網上瘋傳,之後Khanittha上電視台接受訪問表示自己有今日嘅成就,全靠媽媽辛勤工作。對於媽媽嘅工作,Khanittha從嚟唔覺得羞恥,仲話:「我們踏實工作謀生,因此我從不感到自卑。」Khanittha當選後獲得廣告、電影、電視等相關工作,希望改善屋企人嘅生活。而媽媽就叫Khanittha唔使再執垃圾,但自己會繼續拾荒。

圖:FB@Khanittha Phasaeng