新冠肺炎疫情打擊全球經濟,令失業人數增加,台灣一位網民亦因此失業,為咗幫補家計,網民瞞住屋企人偷偷去揸的士賺錢。點知中秋節當日接到一張指定要網民開車去屏東嘅大單,網民為此放棄咗同屋企人一齊去墾丁嘅機會。點知客人正正就係佢嘅父母同妻小,網民妻子仲同佢講:「夫妻不需要隱瞞,生活不一定要富裕」,結局超感動!

呢位網民喺facebook群組「爆廢公社」發文表示,自己因為疫情關係,3月份嘅時候被公司裁員。雖然公司有俾兩個月遣散費俾網民,但當時網民嘅小朋友正值小學入學,妻子肚入面又有未出世嘅BB,正係需要用錢之際。為咗唔令屋企人擔心,網民用自己嘅私己錢買咗架二手車去登記,加入的士司機行列。因為揸的士收入唔穩定,想賺多啲唯有加班,久而久之,網民妻子都覺得有啲奇怪。不過網民繼續隱瞞妻子,收入唔夠就開口問父親借錢,父母亦多咗去網民屋企提供物質支援。

慢慢咁,網民嘅收入開始穩定,但工時依然好長。本來中秋節,網民應承咗小朋友要帶佢去墾丁玩,但就喺兩日前收到一個指明網民去屏東包車旅遊嘅大單。無奈之下,網民唯有放屋企人飛機接呢張單。結果中秋節當日,去到客人指定地點,網民發現竟然係自己屋企附近,而且上車嘅正正就係網民嘅父母同妻小!網民當下唔知要點同妻子解釋,心情亦由驚訝變成虧欠。點知妻子只係同佢講:「夫妻不需要隱瞞,生活不一定要富裕。你為了我跟寶貝,每天努力開車爸爸都有跟我說。中秋節我就放你三天假,走吧去墾丁完成你答應孩子的水母飄。」

其他網友睇完之後紛紛表示感動:「這樓有洋蔥」、「看完眼眶泛紅了」、「好感動,你的家人都好棒」,並為網民一家打氣:「加油,你的父母,老婆小孩都支持你是你內心最強大的後盾」、「一定會渡過難關的」、「有體貼包容的家人,你的家庭是辛福成功的,明天一定更好」。

圖:台灣交通部觀光局