喺揀玩具俾小朋友嘅時候,家長一定要多加留神。喺美國,就有一位2歲小朋友,沖涼嘅時候將玩具入面嘅水噴到眼睛,導致眼睛持續紅腫,甚至發燒,最終確診蜂窩性組織炎,住院個幾禮拜後康復出院,恢復視力。

呢位2歲小朋友Baylor嘅媽媽Eden Strong表示,自己曾經睇過其他媽媽分享沖涼玩具充滿黴菌嘅相,所以Baylor每次沖完涼都會將玩具入面嘅水擠晒出嚟,又會每隔幾個禮拜用漂白水清潔、定期喺陽光下檢下入面有無發霉。但估唔到就算Eden咁頻繁清潔同檢查,仍然阻止唔到細菌喺入面生長。

Eden憶述當時情況,Baylor被玩具入面嘅水噴到眼睛,當時有少少紅,Eden就諗住只係水壓沖到眼睛,所以無太在意,但後來Baylor眼睛越來越紅,於是就嗱嗱聲帶Baylor去求醫,醫生起初開啲眼藥水俾Baylor,但半夜Baylor眼睛腫咗兩倍,範圍擴散到雙頰,緊急送Baylor去睇急症,醫生就開咗啲抗生素。但到咗朝早,Baylor仍然持續紅腫,眼白突起並且開始發燒。Eden帶佢去到另一間規模較大嘅醫院求診,進行電腦斷層掃描檢查視網膜,醫生確診蜂窩性組織炎,住院個幾禮拜後康復出院。

Eden將經歷放上Facebook,呼籲家長要丟棄呢啲會積水嘅玩具,強調「裡面嘅黴菌係無法根除」。

原圖:FB@Eden Strong - No Shame