內地最近興起一股「光盤行動」熱潮,意思就係清空碟入面嘅食物,唔好浪費。上海浦東更有一間綠洲食物銀行,專門收集食品公司生產過剩但未過保質期、超市嗰啲定期下架但質量依然良好嘅食物,再派發俾低收入、戶外工作人士,實行物盡其用,減少浪費。

綠洲食物銀行係全國第一間實體運營嘅「食物銀行」社會公益組織,宜家已經喺上海設立超過100個派發、收集點。食物銀行負責人李冰表示,食物銀行目前每日有600至700人次受益,由2019年8月同超市合作後,至今每日為低收入家庭、清潔工人提供免費蔬菜,並希望未來食物銀行可以再擴大、增加,有效利用食物,環保又唔浪費。

此外,綠洲食物銀行仲設立咗「共享雪櫃」。雪櫃嘅外表同普通販賣機一樣,入面有啲朱古力、餅乾等就快過期嘅食物。符合資格嘅市民經過登記,就可以用身分證嚟刷卡領取呢啲免費食物。李冰認為,共享雪櫃可以令一啲就嚟過期嘅食品免於被銷毀,佢更感謝食物銀行嘅成功有賴公眾、企業夥伴嘅捐贈,同埋義工嘅付出。

圖:微博@上海綠洲公益