新冠肺炎影響全球,令人與人之間嘅距離擴大,不過依然無法阻擋人與人之間嘅交流。美國有個14歲男仔Aiden Yielding今年5月嗰陣被診斷出白血病,但由於疫情期間醫院規定只可以有一位家長陪伴治療。Aiden嘅爸爸Chuck Yielding無辦法陪診,於是就喺囝囝每周治療嗰陣,換上鮮豔嘅衫,喺醫院外面嘅停車場為囝囝跳舞打氣,好有愛~

據美國電視台WFAA報道,患上白血病嘅Aiden要接受為期兩年半、每星期一次嘅療程,Aiden媽媽係醫院麻醉護理師,理所當然成為唯一一個可以陪診嘅家長。Aiden爸爸Chuck雖然無得陪診,但就出盡法寶想Aiden知道自己一直陪住佢。每逢Aiden治療嗰日,無論天氣好壞,Chuck都會喺最近囝囝治療室窗外嘅停車場,著住鮮艷衣服跳舞俾囝囝睇,兩父子仲用手機、耳機即時連線。Aiden話見到爸爸跳舞「整個精神大振,讓我覺得他與我同在。爸爸真的很搞笑。」

圖:wfaa.com