如果喺出面食飯或者買外賣,店員同你講,已經有人幫你埋咗張單,相信唔少人都會覺得詫異。喺英國北愛爾蘭,有一位媽媽喺連鎖快餐店麥當勞買餐嘅時候,得悉前面位客人已經幫佢俾咗錢,感到相當意外,仲以為係惡作劇。店員同佢解釋呢位男士每個禮拜都會幫一位陌生人俾錢,令佢非常感動。

北愛爾蘭媒體報道,當地一名媽媽唐妮(Megan Downy),早前揸車同女兒、姪子去一間麥當勞得來速(Drive-thru),叫咗三份兒童餐、一份麥香雞餐、兩份三層芝士漢堡餐同一份中薯條,之後再去到下一個窗口俾錢,點知店員同佢講,前面嗰位揸白色van仔嘅客人已經幫佢俾咗錢,佢當時仲以為係惡作劇,想拎走佢哋個餐。

店員就同唐妮解釋,呢位揸白色van仔嘅男士每個禮拜都會幫一位陌生人俾錢,唐妮聽到之後覺得好不可思議,連忙上前道謝。唐妮形容呢個善舉好有愛,又話佢同啲小朋友都因為咁而開心咗成日。

原圖:FB@McDonalds Boucher Road