忠於自己,抑或跟大隊走?永遠係好難抉擇嘅課題,綽號「將軍」嘅香港排球運動員蕭昌鴻,人如綽號,心口寫咗勇者,為理想決定放棄穩定職業,雖然佢知道呢條未必係易行嘅路,但對呢個決定依然無怨無悔。

選擇不易行的路

香港並無職業排球隊,打排球唔可以當飯食所以佢大學畢業後就要作抉擇,究竟係留喺在排球發展定係搵正職工作?最後佢決定報考紀律部隊,雖然佢並無諗過放棄排球,依然代表港隊出外比賽,但佢自己都承認,投放喺排球時間少咗好多,「工作要輪班,日夜顛倒,工時又長,練波嘅時間比以前少咗七八成,由一星期練五至六日,變成一星期練一兩日,有時做嘢太攰,甚至唔想練添!」

公務員一向被視為「鐵飯碗」,但蕭昌鴻做咗一年之後,就決定放棄呢份「筍工」,自資開辦排球學校,佢解釋:「其實讀大學嘅時候已經想做排球相關嘅生意,亦試過開辦排球資訊媒體Volleymax同埋Online Shop,我希望自己嘅興趣可以變成事業,但要好大嘅勇氣,當年我並無這種勇氣,見到身邊嘅同學都搵工,覺得自己唔好與別不同,穩穩定定就算,但做落發現好難兼顧,生活無以前咁精彩,令自己好無動力,覺得自己仍然年輕,可承擔較大風險,所以決定開創呢間排球學校。」

佢一開始嘅時候有啲掙扎:「財政係最大考慮,以前月入四萬幾,但創業可能係負數,而且仲要面對朋輩同家人。雖然我嘅家人絕對支持我,但都會有少少擔心,驚我做錯決定。不過自己由細到大,都唔會令佢哋失望,家人都知道我係認真,唔係三分鐘熱度,所以最後都接受同支持。」

遇上疫情 收入歸零

創業從來唔係一件容易事,蕭昌鴻做咗老闆之後就明白呢個道理:「以前返工嘅時候,只要識職責上嘅事就可以,但創業由申請公司註冊到搵地方,細微到添置清潔用品、Book場,全部都要一腳踢,呢個係唔容易,但同時亦係學習嘅機會。」另外,學校開辦無幾耐就遇上疫情,面對好多衝擊,對佢亦係好大嘅挑戰。

佢哋排球學校主要收入來源就係開班教波,但喺新冠疫情之下,運動場關閉,又有限聚令,排球停擺大半年,以致排球學校收入歸零,所以佢哋喺心態上和金錢上都要支持住。

蕭昌鴻坦言,初初遇到疫情會沮喪灰心,因為根本預見唔到疫情幾時完結,不過後嚟佢開始調整心態,反而慶幸喺開業初期遇到疫情,因為排球學校並無太大嘅營運成本,眼見坊間好多體育班要養更多教練,會困難好多。佢亦積極面對疫境,並無坐以待斃,第一,佢哋嘗試拍教學短片放上網,希望維持同家長及學生嘅聯繫;第二,佢哋亦增加不同收入來源,包括引入訓練器材,賣俾學校及朋友,幫補到少少;另外,佢哋亦同其他公司合作,例如剛剛同Run for Good嘅合作,「收埋自己,甚麼也做唔到」蕭昌鴻表示。

雖然面對疫境,但佢依然對未來充滿憧憬:「現時我哋嘅目標係希望訓練班可以運作落去,依家我哋喺荃灣、九龍都有訓練點,未來希望全港各區都有!第二,希望同不同地區做多啲交流訓練,帶學生去見識!」喺香港,夢想從來都係奢侈品,但正如蕭昌鴻喜歡排球嘅理由:「排球講求團體合作,不可能靠一個人贏,而且一開波就唔可以停落嚟,係一項好有挑戰嘅運動。」為咗目標,習慣接受挑戰嘅蕭昌鴻,當然唔會咁易認輸啦!

圖片:受訪者提供


球技了得嘅蕭昌鴻,綽號「將軍」,擔任主攻手。


蕭昌鴻喜歡打排球,因為排球講求團體合作,而且一開波就唔可以停落嚟,係一項好有挑戰嘅運動。

蕭昌鴻創立本地首間排球學校,希望能為排壇帶來全新元素。


現時蕭昌鴻嘅目標係希望訓練班可以運作落去,並且發展到各區都有訓練點!