教育局上學年就聯同長春社文化古蹟資源中心,舉辦「月旦古今:中國歷史人物小故事比賽」,以鼓勵學生透過閱讀自主學習,認識中國重要歷史人物事蹟及佢哋嘅品德情操,提高學生對學習中國歷史同中華文化興趣,培養優良品德。比賽一共有超過100間學校、13000人次參與,長春社文化古蹟資源中心最近就喺網上公布咗比賽結果。

今次比賽分為「中國歷史人物小故事網上閱讀問答比賽」同「向我最喜愛的中國歷史人物致敬創作比賽」兩個部分,而創作比賽亦分為「古人日記」同「時空名信片」兩個項目。「時空明信片」嘅參賽作品當中,有唔少都融合古今,當中包括來自聖母玫瑰書院嘅初中組冠軍作品,向華佗撰寫明信片,希望對方可以給予「靈丹妙藥」解救全球面對緊嘅新冠肺炎疫情。

至於「古人日記」,初中及高中兩組都係由德望學校嘅學生奪冠,佢哋同樣係以王昭君為題,仔細描寫王昭君由自憐無奈至豁然自若嘅心境轉變,又或者將琴音同荒野寂寥緊密相扣,文學技巧亮麗耀目。

得獎名單已經喺比賽網頁公布(http://cache.org.hk/blog/story/),而得獎作品之後亦會結集成《學生成果集》,分發至全港中學,供教師同學生閱覽。

原圖:FB@CACHe西約書室