唔知大家今個中秋過成點?原來做節並唔係必然嘅事,好多低收入家庭平時已經三餐不繼,大時大節想加餸做節都唔係咁容易。今個中秋,本地社企銀杏館就為呢班弱勢社群加餸,喺平時派開嘅平安飯盒基礎上,加埋大蝦、冬菇、雞、蛋、時菜、水果、豬手、叉燒等,仲有有心人送上水果、口罩、月餅、乾麵、紅封包等過節物資,令飯友除咗可以得到溫飽,更能體驗到人間有情!

銀杏館幾日前喺其社交平台發文指,中秋節為飯友加餸,飯友楊婆婆收到中秋飯盒之後,佢珍而重之咁話:「我好耐無做過節,平時搵餐飯食都咁艱難,點敢望有過節飯食……」婆婆仲開心咁話會分開三餐食,員工即時提醒佢食物衛生嘅問題。

銀杏館表示,一個加料嘅小飯盒,已經令婆婆覺得自已喺度「做節」。文末最後多謝各位支持者,成就咗呢個小城裏面唔止一次嘅奇蹟。

圖:FB@銀杏館