疫情期間,唔少人叫多咗外賣,如果遇到外賣湯麵漏曬啲湯出嚟嘅情況,大家又會有咩反應呢?台灣一位網民就遇到呢種情況,聾啞外賣員因為湯麵漏湯表示唔收網民嘅錢。但網民見佢一開始就認錯肯承擔,加上體諒聾啞人士工作不易,最後都找足數,鼓勵聾啞外賣員,網友紛紛留言大讚網民好人。

呢位網民喺facebook群組「爆廢公社二館」發文話自己叫咗一碗湯麵同一碗冰,但外賣員到咗就遲遲唔肯過來交收。初頭網民忙緊都唔為意,直到外賣員拎咗一碗漏咗湯嘅湯麵出嚟,一直比手畫腳,示意網民唔使俾錢。網民問佢發生咩事,外賣員表示自己聽唔到,又用手機打咗2、3分鐘先打咗5個字出嚟:「抱歉,我賠你」。網民先知原嚟外賣員係聾啞人士,其實個湯麵係因為碗爛咗先會漏湯,而且仲食得,最難得係外賣員又主動承擔錯誤。網民覺得聾啞人士搵工作唔易,都想俾啲鼓勵佢,於是照俾足185台幣(約49蚊港幣)俾外賣員,外賣員一直比大拇指多謝佢。

呢個post一出,吸引超過2000個留言回應,紛紛大讚網民:「好心會有好報」、「多一點體諒,就多一點溫情,謝謝您的體諒,好人」、「世界因你而美麗」。

圖:FB@爆廢公社二館