大澳係著名嘅水鄉,通常大家都會喺日頭遊大澳,不過一到中秋夜,大澳嘅夜晚變得不一樣,因為近年大澳都會舉行「大澳水鄉花燈節」,舉頭不但可以望明目,仲有無數嘅花燈,呢啲花燈唔止係打卡熱點,仲散發住無數嘅人情味添!

第三年舉辦 為社區做「儍事」

今年「花燈節」已經踏入第三年,「大澳非茂里」聯同街坊同義工合力繪畫、布置、亮燈,令大澳嘅大街小巷布滿幾百個手繪燈籠,每個都由人手繪畫,特色!

佢哋咁樣做,一方面希望為社區加添色彩,一改小漁村俾人沉悶嘅感覺另一方面亦希望搬到市區工作嘅大澳人,喺中秋節返嚟一齊團圓。所以佢哋除咗掛花燈,仲會籌集月餅、口罩、生果,由義工親自送到每一個長者、基層家庭,又將手繪燈籠送到佢哋屋企,希望喺疫情之下,大澳人仍然可以團團圓圓,享受過節嘅歡樂!

據「大澳非茂利」創辦人張敏芳GermanFB專頁表示:「我哋第一年係無人幫架,個個都唔知我哋搞乜,我哋幾條『茂利,加埋啲朋友仔一齊喺度掛燈,因為你儍吓儍吓去做一件事,過吓過吓又會得,第二年,突然之間好多人話嚟幫手,係要為社區做一啲儍事,我哋因為愛呢個社區,所以就會投入囉!」

疫情之下 傳遞正能量

今年因為疫情關係,佢哋都考慮過取消呢項活動,但大澳好多街坊都覺得現時社區死氣沉沉,連燈籠都唔掛,就更加無生氣!所以佢哋決定繼續舉辦,希望喺現時充斥負能量嘅環境下傳遞一啲正能量。為咗保持社交距離,佢哋就發起大家各自喺屋企畫,收集咗四百個燈籠,再交俾義工掛起,大家都非常開心。

German又話:「其實大澳係一個好有Heart嘅地方,我哋肯行嚟係因為我哋係要做一個榜樣,希望會有人延續。」今個中秋夜,大家可以去大澳睇花燈兼感受大澳嘅人情味,即使你今晚已經安排好節目都唔緊要,亮燈期差不多有一個月,遲少少入去大澳一樣睇到架。詳情可到「大澳非茂里」Facebook專頁了解清楚。

圖片來源:FB@大澳非茂里


今年「花燈節」已踏入第三年,「大澳非茂里」聯同街坊同義工合力繪畫、布置、亮燈,令大澳嘅大街小巷布滿幾百個手繪燈籠。


石仔埗街掛起䌽燈之後,變得色彩繽紛。


每個花燈都係人手繪畫,獨一無二!

今年佢哋製作一隻蟹型燈籠,名為「棚屋蟹」。

由於疫情關係,佢哋發起大家各自喺屋企畫。


街坊上下齊心,合力掛起燈籠,正好展示大澳嘅人情味。