單親媽媽要獨力賺錢養家、照顧小朋友已經唔容易,如果要照顧SEN小朋友就更加辛苦。台灣有位單親媽媽喺社交平台發文,分享自己照顧患有ADHD(專注力失調及過度活躍症 )同EBD(情緒及行為障礙)囝囝嘅經歷,雖然日子過得好辛苦,但佢表示好慶幸囝囝遇到一位愛心老師,老師唔單止引導囝囝多閱讀,9年嚟更加默默幫助佢哋一家。媽媽好感激老師呢位貴人,並勉勵其他同樣育有SEN小朋友嘅父母。

呢位單親媽媽網民喺facebook群組「爆怨公社」發文指,自己老公跟小三走佬,佢哋育有一對子女,囝囝患有ADHD同EBD,曾無數次被轟出教室、診所、醫院,自己亦被小朋友、屋企經濟等問題逼到經常會喺深夜痛哭。但好好彩,囝囝小一嗰年遇到一位貴人,佢就係陳明清老師。陳老師一早就發現囝囝喺學校嘅表現異常,想話去網民屋企做家訪。網民起初2次都避而不見,直到第三次,陳老師終於成功入屋,但只係拍拍網民嘅膊頭同佢講:「辛苦了!媽媽。」之後仲好快走出門口,但網民發現陳老師雙眼泛紅。

自此以後,陳老師不斷以「吃不下、不小心買太多、贈品」等各式藉口送物資俾網民一家,幫囝囝申請免費午晚餐餐券、獎助學金,仲經常請佢哋一齊食飯。生活上嘅幫忙之外,陳老師更鼓勵囝囝多閱讀,從此改善咗佢嘅多動症,仲獲得學校頒發嘅「全校讀者個人借閱第一名」。就算之後網民一家由台中搬去花蓮,陳老師依然心繫網民一家,每月至少打一次電話關心佢哋。

網民媽媽最後感謝陳老師多年嚟對佢哋一家嘅關愛,令佢相信「教育的本質與初衷是為了讓下一代在良善的循環中學習,還能找到存在生而為人,最可貴愛人的力量」。佢亦相信佢嘅囝囝之後一樣會用事實同能力去證明單親、特殊學生一樣可以走出人生嘅康莊大道。

圖:FB@爆怨公社