隨住本港新冠肺炎疫情稍緩,唔少之前暫時關閉嘅公共設施都陸續開放俾市民入場,早前暫時對外開放嘅南豐紗廠CHAT六廠亦都再次開放,俾大家免費入去睇睇藝術展覽!今次CHAT六廠推出嘅「尹秀珍:補天」展覽,係宜家展出緊嘅大型藝術裝置「補天‧中轉站」嘅延伸。藝術家尹秀珍更親自設計咗今次展覽嘅空間,探索代溝同各種社會經濟背景構成嘅集體記憶。

尹秀珍係中國當代藝術嘅領軍人物,其作品致力於探索過去同現在、記憶、全球化、同質化嘅主題。今次展覽將播放尹秀珍特意為是次大型展出創作嘅兩個全新錄像作品——《補天》(2020)同《逆》(2020),其創作主題圍繞家庭關係,分別回溯尹秀珍媽媽以前做紡織工人嘅過去,同尹秀珍嘅成長過程。呢兩段作品展示咗尹秀珍嘅家庭生活軼事,主要探討工業化喺家庭疏離同母女隔閡中嘅角色。

展覽詳情:

日期:2020年10月31號至2021年2月28號

開放時間:早上11點至晚上7點 (逢星期二休館) 

地點:香港荃灣白田壩街45號南豐紗廠CHAT六廠

圖:主辦方提供