喺新冠肺炎疫情下,跨境學生難以返香港嘅學校上堂同考試。新界校長會早前委託內地教育機構,讓身處內地嘅跨境學生可以喺內地考呈分試,以便學校可以將成績喺10月20日前呈交俾教育局。喺上個禮拜就已經有一批跨境學生完成考試,新界校長會嚟緊會安排下一批來自10幾間學校、大約100名跨境學生,繼續喺內地考應。

新界校長會副主席朱偉林表示,跨境學生喺深圳福田一間學校應考,由香港教師視像監考、內地教師在場監考,完成考試之後試卷就會經電腦掃瞄同埋速遞送到香港。另外考生喺應考前亦要量體溫同出示「健康碼」。

有參加內地考試嘅跨境學生家長表示,曾經有諗過帶小朋友嚟香港接受隔離再參加呈分試,但考慮到要消耗好多精力、時間同金錢,所以就放棄咗,好彩最終都等到可以喺內地考呈分試呢個消息,佢形容呈分試過程整體非常順利,內地考場亦都安排妥善。

原圖:南方都市報