新冠肺炎令全球旅遊業進入寒冬時期,餐飲業嘅室內用餐人數亦因此受限,唔少餐廳面臨經營危機。美國紐約曼哈頓餐廳Cafe Du Soleil就出奇招,搭建「氣泡」帳篷,抗疫嘅同時又可以作招徠,吸引唔少人去幫襯打卡。

疫情底下,室內用餐人數被限制,Cafe Du Soleil店主認為,室內只開放20人用餐嘅收入無法支付廚師同其他員工嘅人工,但如果喺室外加設座位,又無人肯俾錢喺無遮無擋、落雨、落雪等環境下用餐。店主之前7月嗰陣喺網上留意到「氣泡餐館」,於是買咗15個透明帳篷返嚟,每個帳篷可以容納6人,搭建或拆卸亦相當簡單。透明帳篷好似一個巨型氣泡咁,既解決咗室外無遮蔽物嘅問題,又可以隔開客人,唔少客人紛紛打電話預約要喺「氣泡」內用餐。有客人更表示,透明帳篷好似童話故事入面灰姑娘嘅馬車咁夢幻,勾起咗佢哋嘅童年回憶。

圖:FB@Cafe Du Soleil