趁家人仲健在,就應該好好孝順,以免將來後悔。喺日本,有一名55歲男子嘅媽媽半年前因為肺癌離世,多年嚟佢帶過媽媽去過200幾次旅行。早前接受電視台訪問,佢展示媽媽臨終前寫俾佢嘅信,內容係感謝佢帶媽媽周圍旅行,又希望兒子可以早日成家立室,令唔少觀眾都覺得感動。

東京電視台節目《跟拍到你家》 (家、ついて行ってイイですか?),早前追訪一位55歲獨居男子長沢竜一,佢爸爸早逝,30年來都同媽媽相依為命,但可惜媽媽喺6年前患上肺癌,病情持續惡化,直至今年3月病逝。

喺呢30年嚟,長沢竜一經常同媽媽喺國內周圍旅行,次數超過200次,每次旅行佢哋都會買當地手信,以及喺景點影嘅遊客照片作為紀念。長沢竜一一直以嚟都好好保存呢啲手信同相片,媽媽離世之後,佢拎出所有相片裝飾媽媽間房。喺訪問期間,佢公開媽媽臨終前寫俾佢嘅信,感謝佢帶媽媽周圍旅行,又希望佢早日成家立室、搵到一位溫柔、可靠嘅妻子,唔少觀眾睇見都覺得感動。

原圖:搜狐