唔少人喺屋企睇電視、打機,都會食下零食,大家都知薯片呢類經油炸嘅零食食得多無益,但估唔到連瓜子都唔可以食咁多!內地傳媒報道,有一對六旬夫婦早前一齊出現大便帶血嘅情況,求醫之後診斷發現二人都患上中晚期嘅大腸癌,但二人本身家族都無腸癌病史,經醫生詳細診斷之後發現,原來係同佢哋食瓜子做零食有關!

報道提到,呢對夫婦兩年前退休之後,經常留喺屋企睇電視、打機,並且以瓜子做零食,呢段時間幾乎每日都食半斤以上瓜子。佢哋嘅診症醫生、腫瘤科主治醫生何威華解釋,市面上嘅五香瓜子、多味瓜子,生產過程中加入大量香料、食鹽同糖精等等,而香料中嘅黃樟素有輕微毒性,攝取少量對人體無害,但長期大量食用就會累積性中毒,引致肝癌同腸癌。另外,腐爛或者品質較差嘅瓜子,亦有機會含有致癌物黃麴毒素,同樣對人體有害。

不過何威華亦強調,瓜子含有嘅油脂,主要以不飽和脂肪酸為主,對人體有益,可以確保大腦正常發育,亦可以轉運膽固醇,降低血液中嘅膽固醇含量,可以保護血管同預防心腦血管疾病,另外瓜子亦含有維他命B1、維他命E等營養成分。何威華指出,大腸癌同飲食習慣有密切關係,而高脂肪、高蛋白、膳食纖維少係結腸癌嘅誘發因素。

原圖:新華社