不得不承認有啲人細細個就已經好有運動天份,仲叻過唔少大人!喺美國,有一位只有6個月大嘅男嬰就已經可以揸實扶手,企喺滑水板上滑水,認真犀利!佢爸爸仲話,兒子可能會打破世界紀錄,成為最年幼嘅滑水者添!

根據美國傳媒報道,美國猶他州一對夫婦Casey Humpherys同Mindi  Humpherys一直以來都熱愛水上運動,尤其是滑水。Mindi今年2月誕下兒子Rich,兩夫婦都好希望可以同埋Rich一齊去滑水。

正當Rich可以扶住物品站立,爸爸Casey就自行製作咗一塊裝有扶手嘅BB滑板,起初就喺屋企地板訓練Rich嘅平衡感,讓Rich捉實扶手企喺滑板上,再拖行滑板模擬滑水嘅情形,經過幾星期嘅訓練,Rich已經習慣滑行嘅感覺,而佢嘅大小肌肉同平衡力亦有所增強。

到咗Rich 6個月零4日大嘅時候,Casey同Mindi就帶Rich去到湖中滑水,Casey喺9月13日分享Rich滑水嘅片段,見到Rich著住BB救生衣,扶實同踩住滑板,由快艇拉住,而Rich臉上表現出興奮嘅表情,期間Casey就喺小船上小心陪住Rich,Mindi就從旁觀看,一旦Rich向後仰,Casey隨即伸手扶住,Rich企返穩之後繼續滑水。

Casey表示,Rich嘅手握力唔錯,可以固定自己30秒、滑行大約45米,太太曾經擔心Rich太細個,唔太樂意俾Rich咁快就滑水。Casey又話,兒子6個月零4日大滑水,相信已經打破2016年由一位6個月27日大佛羅里達州女嬰Zyla St Onge創下嘅「年齡最小玩滑水者」世界紀錄。

片段上載至社交媒體後,獲數以萬計觀看次數,有唔少網民大讚犀利,又讚爸爸喺安全環境訓練兒子,好好保護兒子。但亦有網民就擔心咁細個去滑水會危險,影響成長,呼籲唔好模仿。

原圖:IG@richcaseyhumpherys