喺新冠肺炎疫情期間,香港嘅運動員仍然好俾心機繼續訓練。最近傳嚟好消息,香港賽艇運動員陳至鋒喺Concept 2室內賽艇(滑軌)輕量級男子19至29歲42,195米(全馬)項目中,以2小時32分32.5秒刷新世界紀錄!

其實陳至鋒喺7月同8月嘅時候,已經喺同一組別嘅30分鐘同4分鐘項目上,兩度打破世界紀錄。陳至鋒之後立志,挑戰全馬嘅42,195米嘅距離,佢表示其實自己一直都希望挑戰賽艇機馬拉松,但之前因為需要預備比賽而無時間挑戰,而家因為疫情關係,無晒比賽,於是就決定將計劃付諸實行,佢形容挑戰全馬距離,除咗講求耐力,亦需要有耐性,比起之前其他項目更有挑戰性。

陳至鋒參考咗馬拉松跑手嘅比賽,又綜合教練俾佢嘅意見,最終挑戰成功,9月22日獲Concept 2認可,第三度刷新室內賽艇世界紀錄。下星期一(28日)香港賽艇隊將會恢復正常操練,陳至鋒表示會專注加強自己嘅生理及心理質素,目標係爭取成績,成為香港奧運代表,預備來年奧運資格賽。

原圖:FB@Hong Kong, China Rowing Association