再有香港代表隊揚威國際!喺第32屆國際電腦奧林匹克競賽上,香港學生代表隊共奪得1面金牌同2面銅牌。拔萃男書院嘅梁譽曦以592.62/600分排名全場第三,獲得金獎,係香港學生喺呢個比賽嘅最佳成績。而香港培正中學嘅衛家熙、楊汶璁就奪得銅獎。

電腦奧林匹克競賽專為20歲以下中學生而設,係世界上技術水平最高嘅中學生編寫電腦程式比賽,今屆共有87個國家或地區參加,每個國家或地區可派出4人參賽。受疫情影響,今屆賽事喺9月13至19號以網上方式進行,參賽選手需要喺比賽周內用電腦編寫多個程式,非常考驗選手嘅解難能力同編寫程式技巧。

教育局局長楊潤雄表示,香港隊喺比賽嘅優秀成績着實令人鼓舞,佢感謝學界同教育局一齊協力推動STEM(科學、科技、工程和數學)教育,令學生得以運用佢哋嘅知識同技能實踐解難、培育創意、豐富學習經驗同拓闊視野。

圖:香港電腦奧林匹克競賽網站(左起: 楊汶璁、梁譽曦、衛家熙、鄭希哲)