香港大學署理副校長(研究)顏慶雲獲中國工程院頒發第十三屆光華工程科技獎,光華工程科技獎被視爲中國工程科技界最高嘅獎項,每兩年頒授一次,以表彰喺工程科學技術同工程管理領域作出重要貢獻、取得傑出成就嘅華人工程科技專家。顏慶雲專注於晶體缺陷及其建模,以及納米力學等方面嘅研究,包括喺生物系統上嘅應用。佢研發嘅創新納米力學「率跳躍」測試方法被學術界廣泛採用,宜家正立案成為國家標準。此外,佢研發嘅一類新穎嘅可見光及電化學驅動材料,可應用於驅動微型機器人,研究成果仲已經申請美國專利,正同工業夥伴進行應用研究。

顏慶雲除咗係港大署理副校長之外,仲係建滔基金教授席(物料工程)、工程學院機械工程系物料科學及工程講座教授。今年全國包括港澳地區共有296名有效候選人,而獲獎嘅科學家有41人。顏慶雲對獲獎感到欣喜:「對我個人來説是非常大的鼓舞,提醒我在以後的科研道路上要不斷提升水平,在基礎和應用研究上均力求突破。」

圖:香港大學