對於一啲熱愛體育運動嘅人嚟講,佢哋用慣用熟嘅裝備可以話係佢哋嘅好拍檔,唔見咗嘅話一定好難過!喺美國夏威夷,有一位滑浪好手喺2018年滑浪嘅時候被浪沖翻,而佢嘅滑板亦喺當時被沖走咗。但估唔到嘅係,呢塊滑板竟然兩年之後,喺8000公里外嘅菲律賓南部出現,仲有機會物歸原主添!

外國傳媒報道,呢位叫佛爾特(Doug Falter)嘅滑浪好手,2018年喺夏威夷懷美亞灣(Waimea Bay)滑浪嘅時候,眼白白睇住自己經客製化嘅淡藍色衝浪板,被大浪捲走。呢塊滑板唔見咗咁耐,佛爾特本來都已經「打定輸數」,諗住唔會再搵得返塊滑板。點知最近喺社交媒體上得知,原來呢塊滑板而家喺菲律賓沙蘭加尼島(Sarangani)。

滑板嘅新主人巴蘭蘇拉(Giovanne Branzuela)係當地一位小學老師,佢幾個月前用咗2000菲律賓披索(大約港幣320元),向當地嘅漁民買入。巴蘭蘇拉解釋,嗰位漁民早喺2018年8月就喺海上見到呢塊滑板。佢喺滑板上見到夏威夷削板師卡森(Lyle Carson)嘅名,然後好奇嘅佢就喺Facebook搵到卡森,再由卡森通知佛爾特。

巴蘭蘇拉對得到一塊來自夏威夷嘅滑板,感到不可思議。巴蘭蘇拉同佛爾特透過Facebook傾計,巴蘭蘇拉對滑板可以物歸原主感到高興,佛爾特就計劃新冠肺炎疫情嘅旅行禁令結束後,親自拜訪呢個小島,並以適合初學者嘅滑板同巴蘭蘇拉換返自己嘅滑板。

原圖:FB@Doug Falter Photography