早前香港連續多日天氣不穩,落咗多場暴雨,令公園、草叢附近都出現唔少蝸牛,但竟然有人捉咗啲蝸牛返屋企,諗住煮法國蝸牛食!好彩最後都被女兒阻止,而食物安全中心就提醒,野生蝸牛不適宜食用,喺台灣就曾經有人進食野生蝸牛,患上「廣州管圓線蟲病」,部分人更因此連命都無埋。

最近有網民喺Facebook專頁「Day Day Explode 日日爆」分享,表示有位女同事嘅媽媽同佢嘅朋友喺屋企樓下公園執咗幾隻蝸牛,仲叫女兒搵下有無法國蝸牛嘅食譜,諗住煮法國蝸牛食。呢位女同事隨即質疑「食唔食得㗎」,又叫媽媽放返啲蝸牛喺公園。帖文提到,呢位女同事最終都叫媽媽唔好食,但就未知呢位媽媽嘅朋友最後有無食到喇。

帖文引嚟唔少網民討論,有唔少網民提醒蝸牛有好多寄生蟲,而食物安全中心亦有喺帖文留言,指供食用嘅蝸牛其實係响特定環境下飼養,並且用特定飼料餵飼,相比之下野生蝸牛有寄生蟲嘅風險較高,就算徹底煮熟、消滅寄生蟲,但蝸牛體內亦會從生長環境中積存化學污染物,損害人體,所以千祈唔好食用野生蝸牛喇!

原圖:FB@Day Day Explode 日日爆