由原本五光十色嘅世界,一下子跌入無盡黑暗,呢個過程真係唔係個個都接受到,視障跑手梁小偉Gary就親身經歷過。Gary天生就患有視網膜色素病變,視力唔多好,除咗有夜盲之外,日頭睇嘢都唔係好清楚,但起碼都叫做睇得到。點知喺2009年,有一日Gary起身返工,睜開雙眼漆黑一片,從此徹底失去視力。之後Gary消沉咗一段時間,日日買醉,體重達190磅,究竟佢後嚟係點樣重新振作,仲做埋視障跑手、成立不倒翁共融運動協會幫助更多人?今日就等小編訪問下本人,了解佢嘅心路歷程喇~

Gary雖然一早就知自己有呢個病,有機會失明,但佢就無諗過呢一日嚟得咁快、咁突然。失明之後嘅Gary更同時失業、失戀,根本唔敢出街,日日留喺屋企借酒消愁,嗰排佢同外面世界接觸嘅媒介只係得一部收音機。收音機日日都會報道一啲交通消息、新聞等,Gary聽咗兩年幾都無咩感覺。直至有一日,佢聽到一啲關於死亡嘅新聞,突然間酒醒:人哋想留低都無機會,我既然仲生存緊就應該要珍惜。於是,Gary嘗試搵人幫忙,重新學習技能適應生活。

至於Gary開始跑步,全因佢之前自暴自棄,體重成190磅,成日都要去睇醫生,身體好差。點知出去跑咗2次之後,Gary覺得好辛苦,又開始收埋自己唔去跑。直到義工、領跑員一次次上門鼓勵佢,Gary先再跑返。不過,Gary話初初被領跑員帶住跑步真係好無安全感,成日都覺得自己就嚟撞到墻。透過同領跑員邊跑邊傾偈,Gary慢慢咁同領跑員建立信任,成為朋友,有時Gary要出街買啲嘢都會請領跑員朋友幫下眼,就連Gary宜家嘅女朋友都係咁樣而認識。


Gary同領跑員跑步(受訪者提供)

之後Gary就愛上跑步,不斷參加馬拉松、跑步慈善籌款等活動。不過講到令佢印象最深刻嘅都係南、北極嘅馬拉松,Gary話因為極地好凍,氣候好難適應,出汗拉開小小衫領又驚啲汗結冰,唔拉開又熱。加上當地啲雪厚到上膝頭哥,基本上都跑唔到。但即使咁艱難,Gary都一一克服,成為首位完成南、北極馬拉松嘅視障跑手。Gary宜家更成立咗不倒翁共融運動協會,幫助失明人士重新振作。Gary亦有感香港人少做運動,佢希望大家平時盡量行多啲,並鼓勵大家多運動。唔止係咁,佢更考埋個教練牌,教人做運動添。

Gary同領跑員參加北極馬拉松(受訪者提供)


Gary同領跑員參加北極馬拉松(受訪者提供)


Gary同領跑員參加南極馬拉松(受訪者提供)

圖:受訪者提供