新冠疫情放緩,好多公共遊樂設施都陸續開返,而香港科學館亦都喺今個星期重新開放,仲同香港科技大學共同籌劃專題展覽「百毒不侵──守護健康的抗疫新科技」,等大人細路都能夠認識多啲新型冠狀病毒嘅基本知識,同埋有關抗病毒治療、預防疫苗嘅科學原理,全城一齊抗疫。

呢個展覽展期由即日起至出年2月3號,主要展示科大部分同對抗新冠肺炎相關嘅科研項目,例如智能發燒偵測系統、協助監察家居檢疫人士嘅地理圍欄技術、新型多層次殺菌塗層、研發疫苗嘅關鍵技術等。公眾既可以了解本地抗疫科研成果,又可以加深對病毒嘅認識。

抗疫期間,科學館會分時段開放參觀,除每個星期四休館外,科學館每日會喺早上10點、中午12點、下午2點即場派籌,每日3節,每節2個鐘,先到先得。

圖:香港科學館