隨住新冠肺炎疫情緩和,康文署轄下嘅博物館早前已經重開,香港科學館同香港太空館尋日(23日)開始舉行「2020邵逸夫獎展覽」,介紹今個年度各邵逸夫獎得獎者同佢哋嘅傑出貢獻。

「邵逸夫獎」响2002年11月成立,每年頒發「天文學獎」、「生命科學與醫學獎」同「數學科學獎」三個獎項,得獎者都喺有關領域學術同科研應用方面,有傑出貢獻。

今年邵逸夫天文學獎得獎者為美國史丹福大學嘅羅傑.布蘭福德教授,佢對理論天體物理學作出重要貢獻,特別係喺活躍星系核嘅基本理解、相對論性噴流嘅形成同準直、黑洞嘅能量提取機制同激波中嘅粒子加速及其相關輻射機制。

邵逸夫生命科學與醫學獎今年就有3位得獎者,分別係英國牛津大學嘅格羅.米森伯克教授、德國柏林洪堡大學嘅彼得.黑格曼教授,以及德國維爾茨堡大學嘅格奧爾格.內格爾教授,佢哋致力研發光遺傳學,徹底改革神經科學發展技術。

至於邵逸夫數學科學獎,就有2位得獎者,分別係美國芝加哥大學嘅亞歷山大.貝林森教授,以及以色列耶路撒冷希伯來大學嘅大衛.卡茲丹教授,佢哋為表示論同好多其他數學領域帶嚟根本性影響。

今次展覽由康樂及文化事務署、邵逸夫獎基金會主辦,並由香港科學館、香港太空館、教育局同香港教育城聯合策劃,展覽喺香港科學館1樓大堂展出至11月18日,此外邵逸夫天文學獎得獎者資料亦會喺香港太空館大堂展出至12月28日。

原圖:康樂及文化事務署、邵逸夫獎