清潔工人嘅工作喺疫情下更顯嚴峻,佢哋只係收取微薄嘅人工,但就要做厭惡性嘅工作,仲要經常被玻璃碎、鐵枝等垃圾整傷,更因為未「簽簿」就唔當工傷,情況令人心酸。關注拾荒者對環保作出貢獻嘅「拾平台」,喺其FB專頁發文道出唔少清潔工人嘅辛酸史,有網友留言呼籲為咗工友嘅安全,掉垃圾之前做多步何樂而不為?

拾平台發文指,上月因颱風海高斯襲港,有位清潔姐姐喺八號風球落波之後趕返垃圾站簽到途中,不慎喺街上跣倒導致左膝蓋斷裂移位,要被迫休假。由於當時未簽簿,清潔姐姐嘅傷無得報工傷,只能停薪留職。呢位清潔姐姐表示希望盡快康復復工,因為做「清潔」嘅算係開足工,係疫情底下唯一經濟支柱。

而另一位清潔姐姐亦指住自己小腿上一條約5吋長嘅疤痕話:「呢個係上次掃後巷時俾條鬼鼠鐵支刮到嘅,搞到我停工成兩個月呀!」而呢種情況喺每位工友身上都好常見,「已經習慣到無感覺」,清潔姐姐更表示:「錫身嘅,就做唔到掃街倒垃圾㗎喇!」有網民感謝清潔工人嘅辛勤付出,亦有人呼籲如果有尖利嘅垃圾,不妨放入盒或包好先掉,避免工友受傷。

圖:FB@拾平台