廣告都有教大家養寵物前要先「停一停、諗一諗」,但依然有唔少人養咗一陣就棄養。好多寵物被棄養後就要被逼流浪,或者被帶到動物組織等待領養,不過唔係隻隻寵物都咁好彩可以等到新主人,更多嘅係被人道毀滅。外國動物組織Animal Reality Exposed最近喺社交媒體上載兩張相,相入面有成20幾隻狗狗正「排隊」接受安樂死,場面令人心碎。

組織發文表示,照入面呢啲狗狗,只係當地一間動物庇護所一日需要接受安樂死嘅數量,而呢種情況其實每一日都發生緊。組織指,呢啲狗狗都曾經係人類嘅寵物,佢哋過去曾因為唔同理由被飼養,但後來又因種種原因被棄養。佢哋雖然曾有安排被領養,但因為一直無人問津,最終需要接受安樂死。組織喺文末呼籲大家幫自己嘅寵物絕育,同埋以領養代替購買。呢個post一出,網民紛紛留言表示心痛狗狗,認為如果唔能夠信守飼養一生承諾嘅人根本唔應該飼養寵物。但亦有網民指,領養嘅要求、程序太過繁複,令領養變困難。

圖:FB@Animal Reality Exposed