全球暖化問題日益嚴重,唔好以為佢嘅危害離我哋好遠,其實一直喺我哋身邊!據美國科羅拉多州國家冰雪數據中心一項研究顯示,全球溫室氣體排放量若按目前速度增長,永久凍土(permafrost)將會融化並釋出水銀(甲基汞)等有毒物質污染河流同水中生物。如果唔加以控制,到2050年積聚喺魚類嘅水銀含量就會超出安全標準,威脅全球人類健康。

呢項研究上個禮拜喺科學期刊《自然通訊》發表,研究團隊曾喺2018年同美國地質調查局等機構研究估計,北半球永久凍土(至少連續兩年溫度為0℃或以下嘅土壤)嘅水銀含量幾乎係全球土壤、海洋、大氣層含量總和嘅2倍。一旦永久凍土融化,呢啲水銀就會釋出,首先污染全球最長嘅三文魚河——育空河(Yukon River)。

研究指,如果按照目前碳排放量嘅增長速度,到2050年,育空河魚類嘅水銀含量將超出美國聯邦安全準則。去到2100年,育空河嘅水銀含量更將增加一倍。首席研究員Kevin Schaefer指出,育空河出現嘅問題將影響全球,永久凍土釋出嘅水銀會污染河流,最終污染海洋,繼而影響全球。

圖:網上圖片