今日中小學學生終於可以返學校復課,不過佢哋又知唔知自己點解要讀書呢?內地貴州一位叫劉秀祥嘅副校長,細細個就要揹起屋企重擔,雖然環境艱難,但佢堅信只有讀書先可以改變命運,於是一邊做散工一邊照顧母親之際,仍然堅持返學讀書。大學畢業之後,劉秀祥放棄優厚工作機會,毅然返鄉下任教,幫助、資助嗰啲因為經濟問題無得讀書嘅人。

劉秀祥生於貴州弄林村,幼時喪父,母親傷心過度患上精神病,加上佢嘅哥哥姐姐都外出謀生,剩返劉秀祥照顧母親。不過,劉秀祥並無因此放棄學業,努力考上縣城嘅中學。為咗喺縣城租屋讀書,劉秀祥放學之後去拾荒、打散工嚟賺錢,仲試過千里揹住母親去大學。劉秀祥嘅事跡亦因此被傳媒廣泛報道,佢更收到唔少幫助,但都被佢拒絕,佢話:「我覺得人活著不應該讓他人覺得可憐,而是讓人覺得可親和可敬。」

雖然拒絕人哋幫忙,但劉秀祥就樂於助人,邊讀書邊打工寄錢返鄉下,幫助嗰啲同佢以前一樣需要幫助嘅人。大學畢業之後,劉秀祥收到唔少企業嘅offer,但佢突然收到之前拾荒識嘅一個妹妹嘅電話, 話俾佢知自己唔想讀書,要準備結婚。短短一個通話改變咗劉秀祥往後嘅人生,佢決定返鄉下教書,成為「守夢人」守護人哋嘅夢想。佢話宜家嘅學生最大嘅問題係迷惘,唔明點解要讀書,所以佢想通過自身經歷,話俾嗰啲迷惘嘅小朋友知:人生必須有夢想。通過努力,劉秀祥陸續將家鄉嘅學生由工地、車間拉返入校園讀書,劉秀祥認為只要幫貧困學生解除求學嘅後顧之憂,先可以避免學生中途辍學。由2012年到宜家,劉秀祥自己資助或對接資助嘅學生有1900多人。

圖:網上圖片