新冠肺炎疫情下,全港學生長時間無法返學校上堂,喺2月尾,當時仲讀緊小六嘅黃皜翹Chloe就創辦咗「同享童分」呢個平台,希望以學生嘅力量幫助有需要嘅小朋友,解答學習疑難。Chloe最近接受我哋嘅訪問,分享成立呢個平台面對嘅困難。

Chloe表示,喺疫情初期見到有多位社會人士,都紛紛出錢出力,買口罩送俾有需要嘅人,而佢亦見到兩間華仁書院(香港華仁書院、九龍華仁書院)都有捐口罩,令佢意識到其實「學生都可以幫人」。於是佢就喺,2月尾成立「同享童分」,目標係「以學生力量幫助有需要小朋友」。佢憂慮,基層嘅小朋友喺停課期間唔識做功課,「父母幫唔到又請唔起補習老師,會追唔上課程」,成立「同享童分」,邀請學生幫佢哋,令佢哋感覺到「有人幫」。

「同享童分」成立嗰陣,Chloe搵嚟3位同學仔幫手,至今成個團隊已經有23位學生導師,來自14間中小學,由小五至中六不等。但Chloe坦言,過程中都面對唔少困難,「最深刻搞第一堂問功課,只有3個入嚟,無人問,當時都想放棄」,後來想搵機構幫手推廣,但啲機構可能因為怕要負責任,所以唔想幫,好彩最後都得到循道衛理中心同英華女學校嘅幫助。

Chloe嘅父母都好支持Chloe成立「同享童分」,並以實際行動協助。Chloe舉例,喺佢聯絡中學校長嘅時候,爸爸就同佢綵排點樣同校務處對答,等佢唔使咁緊張,又幫佢剪輯影片放上「同享童分」嘅平台上。

今年9月Chloe升上中一,佢表示升上中學都會比較忙,但「同享童分」而家有23位組員,相信都可以繼續運作,就算疫情過後,唔再需要用Zoom上堂,但基層嘅小朋友無補習老師,「同享童分」都希望可以繼續幫到佢哋。

原圖:黃皜翹Chloe、FB@同享童分

Chloe同其他導師用Zoom做討論。

Chloe認真為直播做準備。

Chloe直播截圖。


Chloe嘅父母都好支持Chloe成立「同享童分」,並以實際行動協助。