喺西班牙桑坦德,上個禮拜舉行嘅三項鐵人賽入面,發生咗一件令人窩心嘅事件。話說喺比賽嘅尾段,西班牙選手Diego Mentriga同英國選手James Teagle爭奪緊季軍,點知喺最後一個彎位,領先緊嘅James行錯路、撞向鐵欄,令Diego得以超前,跑向終點。點知,Diego喺臨過終點前,竟然停落嚟,向James伸出友誼之手,讓James先過終點。

最終James贏得季軍,Diego排第4,錯失獎牌。賽後記者問Diego,點解要放棄登上頒獎台機會,Diego回答指「見到佢(James)跑錯路線,我就停落嚟,因為呢塊獎牌係佢實至名歸嘅」,Diego仲話「如果俾多我一次機會,我都會做同樣決定」。

Diego嘅舉動引嚟大批網民讚賞,James事後喺社交網站講返件事時,佢當時撞到圍欄就以為比賽已經完結,Diego嘅決定出乎意料,讚賞Diego表現出令人難以置信嘅正直同體育精神。

原圖:IG@james_teagle