有「雪豹」之稱嘅尼泊爾傳奇雪巴人Ang Rita Sherpa,尋日喺加德滿都嘅家中病逝,享年72歲。

Ang Rita Sherpa喺尼泊爾登山界享有「雪豹」美譽,佢喺1983年就首次以「無氧方式」(即係唔用氧氣瓶)下,登上8848米高嘅世界最高峰珠穆朗瑪峰,到咗1990年佢第6次成功以無氧方式登上珠峰,刷新世界紀錄,其後分別喺1992、1993、1995及1996年再成功登上珠峰,成為史上首位10次以無氧方式登上珠峰嘅人。

Ang Rita Sherpa喺1948年响世尼泊爾東部索魯孔布縣出世,當地盛產登山嚮導,15歲嘅時候Ang Rita Sherpa就以挑夫身份進入登山界,除咗珠峰,佢仲曾經登過尼泊爾境內、其他8000米以上嘅高峰。近年佢健康欠佳,喺2017年曾經中過風,腦部有血塊需要入院治理,此外肝臟都一直有啲小問題,多次要入院治療。

原圖:Twitter@nepaltourismb