腦癱患者係小兒時期一種常見嘅傷殘情況,患者嘅運動能力比較差,生活甚至不能自理。天津拳擊手汪強就係腦癱患者,多年嚟多得父親汪寶柱幫佢按摩、鍛煉佢,先可以成為拳擊冠軍。後來汪寶柱病倒,汪強亦反過來照顧爸爸,仲去打比賽贏獎金治療爸爸,喺佢眼中,佢哋係父子,更加係朋友。

汪寶柱曾經係拳擊教練,後嚟去咗工廠做嘢識咗妻子,妻子懷孕7個月之後生咗早產子汪強。汪強被確診為腦癱,6歲大仍未識行路,且智力發展遲緩。不過汪寶柱夫妻並無放棄佢,汪寶柱更自學按摩,每日為汪強按摩4個鐘,汪強終於慢慢學識行路、加減法。但汪寶柱擔心汪強以後會被歧視、欺凌,就諗住教佢拳擊等佢可以自保,又可以有一技之長。

為咗訓練汪強,汪寶柱自己做埋人肉沙包俾佢練拳,更因為一次意外汪寶柱嘅右眼被汪強擊中,造成永久失明。汪強最終不負所望,贏得全國拳擊協會拳王爭霸賽69公斤級比賽冠軍,成為當地第一位殘疾職業拳手。可惜天有不測風雲,汪寶柱因過度疲勞而確診尿毒症,需要換腎。汪強二話不說想要捐自己個腎俾爸爸:「原來你救我,現在我救你」,但遭到汪寶柱嘅強烈反對:「好不容易將他培養成一個健康的人,我不想讓他失去一個腎。」成5年無打過比賽嘅汪強再一次上台,為嘅係贏獎金治療爸爸嘅病,今次輪到汪強每日幫爸爸按摩、照顧佢。汪寶柱心疼汪強打比賽經常受傷,有過輕生念頭,但汪強嘅努力令佢打消呢個念頭:「努力活著,這個家不能散。」

圖:中新網、網上圖片