新冠肺炎打擊全球經濟,令唔少人失業,好多外傭亦因為出入境限制而無工開。有位菲律賓姐姐眼見家鄉嘅鄰居無收入,於是問僱主借錢買糧食俾鄰居啲小朋友,僱主知道姐姐係做善事,更願意自掏腰包買糧食。最近僱主收到幾張小朋友拎住糧食開心合照嘅相,自言感覺非常奇妙,網民大讚僱主同姐姐都係好人。

呢位僱主早前喺FB群組「外傭僱主必看新聞訊息」發文表示,屋企嘅姐姐早排問僱主借咗幾百蚊,後來姐姐先話返俾僱主知因為新冠肺炎,菲律賓果邊唔出得街,鄰居無得返工無晒收入,姐姐借嘅錢其實係用嚟買糧食俾鄰居嘅小朋友。僱主得知姐姐嘅善舉,有心叫佢唔使還錢,姐姐就話如果唔使還佢會買多一次。僱主之後叫姐姐照還錢,但就俾500蚊俾姐姐再買一次糧食。直至僱主最近收到幾張菲律賓小朋友拎住糧食開心合照嘅相,表示「500蚊直接用黎幫晒小朋友,中間無行政費」,更稱「感覺非常奇妙」。網民紛紛大讚僱主同姐姐:「善心人請到善心人,係大家嘅福氣」、「菲姐和主人,都應該鼓掌」。

圖:FB@外傭僱主必看新聞訊息